ཡིག་གཟུགས་སྒྱུ་རྩལ་འཛིན་གྲྭའི་མཐར་ཕྱིན་སློབ་མ་སློབ་མཇུག་སྒྲིལ་བའི་མཛད་སྒོ།
རྩེ་ཁོག་རྫོང་མི་རིགས་སློབ་འབྲིང་དང་པོའི་ཡིག་གཟུགས་སྒྱུ་རྩལ་འཛིན་གྲྭའི་མཐར་ཕྱིན་སློབ་མ་སློབ་མཇུག་སྒྲིལ་བའི་མཛད་སྒོ།
ཟླ5བའི་ཚེས28ཉིན། རྩེ་ཁོག་རྫོང་མི་རིགས་སློབ་འབྲིང་དང་པོས་ཡིག་གཟུགས་སྒྱུ་རྩལ་འཛིན་གྲྭའི་མཐར་ཕྱིན་སློབ་མ་སློབ་མཇུག་སྒྲིལ་བའི་མཛད་སྒོ་སྤེལ།
རྩེ་ཁོག་རྫོང་མི་རིགས་སློབ་འབྲིང་དང་པོའི་ཡིག་གཟུགས་སྒྱུ་རྩལ་འཛིན་གྲྭ་ནི། རང་མི་རིགས་ཀྱི་སྲོལ་རྒྱུན་རིག་གནས་ལས་བོད་ཀྱི་ཡིག་གཟུགས་བྲིས་རྒྱུན་འཛིན་སྐྱོང་སྤེལ་གསུམ་བྱེད་པར་དམིགས་ནས། 2018ལོའི་ཟླ་གསུམ་པར། རང་སློབ་གྲྭའི་དབུ་ཁྲིད་དག་གི་ཐུགས་བཀོད་བཞིན་སྒྲུབ་པ་ཞིག་ཡིན་ལ། སློབ་མའི་ཆུ་ཚད་ལ་གཞིགས་ཏེ་སྡེབ་བྲིས་དབུ་ཅན་དང་། དབུས་བྲིས་ཚུགས་རིང་དང་ཚུགས་ཐུང་། ཚུགས་ཆུང་། འཁྱུག་མ་ཚུགས། འབྲུ་ཚ་སོགས་ཁྲིད་བཞིན་ཡོད།
ཐེངས་འདིར་བོད་ཀྱི་བྲིས་པ་དང་རི་མོ་བ་གྲགས་ཅན་སྦྲ་ཚང་བསོད་ནམས་རྒྱལ་ནས་བྲིས་ཀྱི་དགེ་མཚན་དང་ལོ་རྒྱུས།
བྲིས་རྒྱུན་གྱི་གལ་ཆེན་རང་བཞིན། བྲིས་ཀྱི་མན་ངག་སོགས་སློབ་མ་རྣམས་ལ་སྙིང་གཏམ་གྱི་ཚུལ་དུ་གསུང་བཤད་གནངས།
རྩེ་ཁོག་རྫོང་མི་རིགས་སློབ་འབྲིང་དང་པོའི་སློབ་གཙོ་རིན་ཆེན་ཚེ་རིང་ལགས་ནས་མཐར་ཕྱིན་སློབ་མ་དག་ལ་རྟེན་འབྲེལ་ཞུས་པ་དང་ཆབས་ཅིག ཁྱེད་ཅག་གིས་བོད་ཀྱི་བྲིས་གཟུགས་ཡག་པོར་སྦྱངས་ནས་རང་ཉིད་ཀྱི་ནུས་པ་སྐྱེད་སྲིང་བྱས་ཏེ་མི་རིགས་རིག་གནས་རྒྱུད་འཛིན་ལེགས་པོར་བྱ་དགོས་ཤིང་།
ང་ཚོ་རང་གིས་རང་མི་རིགས་ཀྱི་ཕུལ་བྱུང་རིག་གནས་ལ་མཐོང་ཆེན་བྱ་དགོས་པ་དང་། ད་དུང་གཞན་གྱི་ཤེས་བྱ་ལེགས་པར་སྦྱངས་ནས་ཀུན་སྤྱོད་ཇེ་ལེགས་དང་ཡོན་ཏན་ཇེ་འཛོམས་སུ་གཏང་དགོས། མདོར་ན་ཁྱེད་ཅག་གིས་མི་རིགས་རིག་གནས་དར་སྤེལ་བཏང་ནས་གསར་གཏོད་ཀྱི་སྤོབས་པ་དང་ལྡན་པ་ཞིག་བྱ་དགོས་ཞེས་གསུངས།
|
|
|
|
|
|
